近來

近來真係好攰,好攰.

加多左份full time job,而家一份full一份part time,基本上做足7天, 偶然有個下晝可以休息一下.

咁博原因係我個permanent residence 的申請在上星期正式批左. 基本上已經沒有其他因素會令我得唔到加拿大人的身份. 或者從言語中,大家未感受我的興奮, 但當晚我收到個email的時候, 係興奮到嘈醒左全屋人.

事實上, 我始終適應唔到香港的生活,工作及節奏. 我好怕人車爭路, 人與人之間肩碰肩的感覺. 香港的夏天更令我吃不消. 體力下降得好緊要. 能夠有機會返加拿大重新開始, 我真係感到一種釋放.

最重要係, 今次搞掂移民後, 我可以在加拿大任何一個地方居住,不受限制. 我可以選擇vancouver, toronto, Calgary, 生活上既有唐餐食, 節奏上又不會太過急速.

就係因為咁, 所以在香港打緊兩份工, 希望盡快儲多$$上路, 今次真係一路好走啦. 唔好望返轉頭喇..

不過我不會一下子返加拿大定居住. 由於加拿大移民局要求我8月31日前完成最後手續. 所以我7月尾將來飛返加拿大領取immigration visa 同埋搞埋SIN card,同楓葉卡. 跟住返香港繼續做野, 過埋summer先走. 一定要make sure,有少少盤川先再返加拿大.不過月尾返加拿大, 順道會去Manitoba探一探路,看看有沒有發展的可能.

anyway, 下月尾返加拿大就當係旅遊抖抖啦.

係咪以後唔返香港? 難講,難講. 好多原因影響決定. 如果有好的工作, 一定會返黎!! 但係亦要考慮到成為citizen將會係兩年的事, 到時可能要考慮成家立室等等. 住屋, 醫療, 福利, 社會穩定都係好重要的考慮因素. 到時先算啦, 既來之則安之.

夠鐘返工,再見.

難得的好司機

我自己本身在香港很少搭的士. 實在邊度都去到, 又在唔趕時間下.都會選擇其他交通工具.
加上我對某些的士司機冇乜好感. 成日以為自己揸緊架formula 1咁. 左穿又插. 明明前面係紅燈都唔收油, 硬係去到交通燈前先大力俾brake.佢地唔會諗下又傷車, 乘客又唔會坐得舒服. 何必呢?

但今次的那一位司機真係抵讚到不得了. 趁機會真係要讚下佢.

話說上星期某一日我要到亞洲空運中心, 我淨係知o係機場o個邊, 但係唔知有咩車到, 所以以最合理, 又一定會準時方式,先坐地鐵,到東涌轉的士.

去到的士站, 先找大嶼山的士, 可是等極都等唔到, 唯有向紅的埋手. 本著敬業樂業的精神, 加上的士站上冇寫住向市區, 冇人拒載係咪?

如是者先上第一架, 話去XXXXXX, 佢話唔識路bor,你可唔可以帶路?我話唔識, 咁冇謂再講, 轉坐後面o個架, 同樣答案, 唔識.

第3架, 上車之後佢就話, 應該冇問題的, 有路牌, 應該可以找到. 結果就上左車向亞洲空運中心進發.一路上,個司機就話"冇理由唔識去的, 佢地唔肯去je! " 對此我沒有意見, 事實上我沒有證據證明對方係識路,但唔想去. 反正香港的士司機的確有前科, 就算有此情況出現上我身上亦不見得出奇. 我心中只想快些到達目的地.

如是者, 終於到達目的地, 仲o係gate門口放得低我tim, 車資大概22,23蚊到. 咁禮貌上我要左tips佢, 我同佢講收40, 都諗住唔找錢就離開架的士.點不知個的士司機的舉動真係一流. 佢話唔洗咁多, 仲俾返10蚊我tim. 老實說,我估都估唔到. 講真, 唔係去借機去表揚自己慷慨or 其他野, 只不過人地等左咁耐客, 接支細旗, 禮貌上俾d tips,唔係什麼特別. 我覺得幾合理. 可是司機竟然話唔洗咁多,令我對佢產生一種敬意. lee d就真係叫做專業.

anyway,我覺得幾開心就係自己好幸運遇到一個咁專業的司機. 佢絕對有權好似之前o個2位司機一樣, 話唔識路, 博支大旗出市區, 佢可能放低我之後, 兜好耐都未有人出返市區. 但佢依然以專業行先. 真係好正. 佢最終worst case吉車出去, 冇左幾舊, 但係嬴返黎係人地對佢的尊重.


講返移民o個度, 個medical report在5月頭已經到達加拿大. 同律師傾過,佢話預計6月尾會出一個類似immigration visa,申請者要持有這個visa先可以入境成為加拿大人. 有兩個方法去拎lee個visa,一係寄passport到buffalo ge immigration centre,佢地睇完個passport, 冇問題, 就會連passport,加visa寄返香港, 另一方法就係親自落美國拎. 我暫時選擇後者. 我諗住親自過加拿大一轉拎個visa,順便入境後搞埋d 醫療card, 拎埋social security number,搞埋楓葉card等. 可是將未必係6月尾, 我諗住在香港儲少少盤川後先上路. 因為除左landing之外, 我仲諗留加拿大2,3個星期找工作. 碰碰運氣吧.

怎樣成為航空公司機師(二)

上回講到有一些工作可以build up experience.今次可以講下累積足夠飛行時數後可以選擇什麼工作.

當一個機師累積差不多500至1000飛行小時後, 佢地在工作選擇方向就會多了. 比如說, 在加拿大除了Air Canada, Westjet, Sunwing, Air Transat 等大規模航空公司外, 加拿大本土亦有很多飛regional, Charter operation的小型航空公司, 飛機當然並不是boeing或者Airbus啦, 因為他們所飛的地方都係人口比較少, 需求比較低的地方.

但點解仲會有公司辦這些航線?

因為加拿大的冬天係非同小可, 落雪基本上係例牌的事, 有d偏遠的地方剷雪效率比較低, 就算可以開車到的地方, 路面狀況亦未必許可. 所以空中交通變成唯一跟對外可以聯絡的交通工具, 除左載人之外, 仲有貨呢, 有d偏遠的town, 如果貨櫃車因為天氣問題去唔到, 就要靠貨運公司包左一架飛機,專運食物, 糧食去當地.

這些事情在香港說可能太誇張, 因為根本發生的可能性近乎零, 可是加拿大實在太大, 有好多地方, 係一些細小的town,係一些原居民住, 所以一定要有相當的交通運輸要令佢地未至於跟外界斷絕聯絡.

所以既然有這些公司, 當然需要機師啦. 所以有些機師好似我咁, 有大約1000小時就可以嘗試apply這些公司, 睇下有冇機會了. 別以為這些公司人工會好高. 佢地請得你, 都知道你的目標好大可能係航空公司,如air Canada等, 根本冇諗過係佢地度做過世, 擺明又係o係佢地度累累飛行經驗, 所以人工真的不高, 多數只有幾百元低薪加10至20 加元per an hour. 加上佢地要資助你training,肯定不會俾你成日飛, 因為你愈飛得多, 你就會更快累積足夠時數,離開公司.所以佢地寧願請多幾個人, 令自己人手編配更加多選擇.

現在就介紹下有咩飛機佢地會飛, 我相信這些飛機係大家o係香港肯定見不到,因為香港停泊費貴, 就算full load去香港, 都唔會賺到$$. 加上大型航空公司太多, 根本冇利潤可言.

首先

B1900

這架飛機叫B1900, 在一些地區如非洲, 澳洲, 太平洋島國, 美國等地方都係非常普遍的飛機, 多數都係飛town to town,很少飛往大城市. 至於上圖o個間公司其實並非Air Canada,而係Air Gerogian 以包機形式承包左Air Canada某些航點飛.他們亦有飛toronto, 由toronto飛kingston,有時就係由佢地代Air Canada飛了.

大概可載19人到, 當然啦,短途機, 冇bathroom, 亦冇cabin crew, 更沒有餐飲, 基本上跟坐巴士沒有分別.

Dash 8-100 or 200 series

Dash8 係其中一架我非常喜歡的飛機, 一來係加拿大制造, 2來當年學飛的時間,經常在機場見到, 感到好有歸屬感. 所以其中一個願望就係將來有機會親身試下駕駛這架飛機.

Dash 8相信會比較多人曾經見過, 如果有些朋友去過歐洲, 澳洲,紐西蘭, 美國,加拿大等地都應該會見過這架飛機. 大概可載20-30人到. 亦係for 短途飛機, 航程好多時只有1-2小時.
比如在加拿大, Air Canada Jazz亦有很多Dash 8, 由toronto出發到North Bay, London,Ontario等都係用Dash 8. 

Fairchild Metroliner

Metro又係其中一種短途客機. 大概載10至20人到, 亦不會飛得太高. 大概20000尺到.

Kingair

Kingair 係另一款短途飛機. 但卻好少用於客機, 反而係用作包機之用,即係一團體,或者一個商人自己包左架機,佢地想飛去邊, 就飛去邊.事實上,加拿大有好多地方, 雖然有schedule flights,但係航班選擇不多, 好多businessman都會選擇搵間charter company,quote 個價, 價錢適合, 就可以講好o係邊度上機,幾點上機便可.

亦一用途係用作medavac. Medevac 係咩黎呢? 即係air ambulance的意思.

基於加拿大太大, 基本上加拿大政府係沒有飛行服務隊, 每一個省, 甚至乎每一個城市, 佢地的飛行醫療服務隊都係外判. 當然外判還外判, 一定要間公司有留咁上下機隊, 醫療設備, 醫療人員先可以承包該地點的air ambulance服務.

比如說A town有一病人受左傷,但由於沒有足夠的醫療設備,當地的疹所就會要求醫療公司派出一架包機跟醫護人員到A town的機場, 接送該病人到一些醫療設備比較完善的城市. 最普遍會係做手術. 因為並唔係每一個town都會有足夠醫療設施, 所以無可避免要靠飛機送佢地去適合的地方接受治療.

這些飛機基本上就係一架空中救護車,一切醫療設備都有. 非常完善, 好讓病人在運送途中得到足夠的照顧.

當然我有朋友亦經歷左另一種情況.說起來非常有趣. 由於一些細小的town缺乏醫護人員. 所以有一個早上,佢地接載一班醫療人員包括護士,醫生, 藥物飛到一個小鎮睇症. 結果我朋友跟機長就沒有什麼好做, 唯有在terminal等, 等足6-7小時,等日落, 醫生,護士完成工作後, 再接佢地飛返原地. 真係好慘情, 因為飛行的人工跟在地上等的人工唔同, 冇記錯佢當年飛的時候收入係20加元per hour,但在地上等只有10元.

仲有另一例子亦係非常搞笑. 又係由於該地方沒有人才,需要從其他地方坐飛機來. 今次唔係醫生,而係法官及其他相關人員. 原來並唔係每一個地方,小鎮有註當地的法官,律師, 老實講,比我都唔做啦, 我讀咁多書, 叫我o係個town仔做法官,又唔係成日有case要審, 咪悶死, 亦會白出糧, 係咪? 所以有一早上,我朋友跟機長又接載一批法官, 相關人員去當地法院. 所講的案件當然未必係殺人等大case.可能只係超速, 違例泊車, 醉駕等細小案件. Again,我的朋友沒有什麼好做, 結果點呢? 無聊地去埋法院聽審. 我聽完真係覺得幾慘情, 飛就飛2,3個小時, 坐就可能坐足成個下午.

anyway,今次講住咁多先, 下次講下一些在加拿大當機師的辛酸史.

怎樣成為航空公司機師?

近兩星期都有朋友留言問到怎樣成為航空公司機師.

就借這個機會去講一講.

機師in definition --- 有執照飛行的人, 就是機師, 可以係私人機師,包機機師,貨機機師 戰機機師, 航空公司機師等等.

機師牌照大概可為3種:

1. Private Pilot License(PPL) --- 私人執照, 只可以作私人用途飛行. 不可以借著PPL用來作商業用途賺取金錢.

2. Commercial Pilot License(CPL) ----商用飛行員執照. 持有該執照,可以作商業用途飛行, 包括航空公司, 貨機, 跳降傘機師, 農場在空中播種機師, 飛行教練, 包機機師等等.

3. Airline Transport Pilot License (ATPL)----航空運輸飛行員執照, 持有執照, 可以受聘於航空公司, 成為公司的副機師, 以至機長.

基本上, 世界上大部分航空公司都要求入職的機師,持有ATPL的資格. 當然這亦有例外, 如果係航空公司培訓的話, 他們畢業時,只會持有CPL,同埋一個fozen ATPL and multi instrument rating.

每一個機師, 由零經驗, 以至成為一個航空公司機師要經歷非常長的時間.
他們首先會加入一些飛行學校, 接受飛行訓練, 由PPL 執照開始考, 隨著經驗與技術日漸增長, 佢地可以接受飛行試(flight test),如果flight test pass的話, 就可以考獲CPL. 屆時可以受聘於公司,作飛行工作,例如以上列出的工種等.

大家會問, d飛行經驗邊個知? 一間公司如果想聘用一個機師, 點知道他的飛行經驗等? 所以我們每一個機師會有一本叫Log book的簿. 會記錄左每一次飛行的時間, 飛行地點, 飛機類型, 飛行日子, 年份, 誰是機長, 誰是副機師, 是單引擎, 還是雙引擎等等.

下圖就係每一個機師都會有的logbook,基本上本logbook係跟個機師一世, 直至退休或者退出這個行業為止.

係咪有CPL就一定有公司聘用?

答案: 否

航空業發展成熟的國家如加拿大,美國, 紐西蘭, 澳洲,歐洲等國, 只要能夠負擔起學費加上努力, 基本上都可以考取CPL. 所以有CPL,並不等於一定公司聘用. 好多有意繼續在這行發展的朋友都會考取另一資格叫做multi instrument rating, 有左multi instrument rating就可以駕駛包機, 小型客機.

記得我之前講過, 每個機師係有本logbook跟身. 每間公司收到resume後, 除左睇下個applicant有什麼執照外?亦會留意該applicant有幾多飛行時數,基本上時數愈多,被邀請interview的機會愈大.

比大家一個例子.

加拿大一間小型Cargo company, skylink Express

請副機師.

B1900 First Officers(副機師):  Commercial Pilot's Licence
1000 hours total time
200 hours multi-engine airplane
Successful completion of  IATRA or ATPL written examination with a mark of > 70%
Multi-engine instrument rating

從以上example見到, 有CPL並非一定可以被公司invite for interview. 要得到以上公司邀請interview, 至少要有1000小時總飛行經驗. 200小時雙引擎飛行經驗. 同埋要考取ATPL 的筆試. 加上multi instrument rating.

而大部分飛行員完成training program之後, 大概會有250小時飛行經驗, 所以如果有意自費到外國學飛的朋友, 記住考取CPL,並不代一定會有公司聘用. 飛行經驗係另一重要因素.

點樣可以由250小時變成1000小時呢?

其實我地叫那些剛完成training 的pilots叫做entry level pilots. 基本上佢地從沒有飛行工作經驗,好難搵公司請. 所以要build up flight experience, 要另謀出路.

1. flight instructor---好似我自己咁, 親身考取instructor rating(教練執照)教人揸飛機, 每一個小時在空中教學生的時間, 都會記錄在logbook上. 亦係其中一份頗辛苦的工作, 小型飛機, 大多沒有autopilot,經常要phyically 飛架機, 又沒有先進儀器detect空中其他飛機, 要靠肉眼要找到其他小型飛機, 又要諗下小型飛機上空間沒多大, 屈在空中1,2小時的確幾辛苦的. 又要諗下,基本上,空中只有你跟學生,佢係一個唔識飛的人, 佢做錯任何野, 就要由你去救. 你救唔到, 就大家一齊嗚呼. 所以壓力都幾大.

2. 做跳降飛機師, 跳過降傘的朋友, 都知道飛機內有兩個人, 一個係陪你飛的跳傘員, 一個係就係駕駛飛機上天的機師, 佢地大多都係剛完成training 的entry level pilot. 佢地職責由係帶個飛機上天, 跟住帶返架機,落地上, 工作非常輕易, 可是要諗下, 有工,就有人工, 如果一整日冇人跳傘的話,基本上係零收入, 好難以正職維持生計.

3. 播種飛行員---- 又或者可以作小型飛機機師,駕駛飛機在空中播種或者發放殺蟲藥. 可是這些是seasonal 工作, 並不經常有收入,又是一份難以作正職的飛行工作.

4. fire patrol ---即係駕駛飛機, 在空中周圍飛, 一路飛, 一路觀察各森林睇下有冇火災,或者煙. again,係seasonal工作, 因為只有夏天才是火災旺季, 冬天落雪更講不上火災.

基本上, 以上就係其中幾份entry level pilot可以build up flight experience的工作, 以上工作人工不高, 斷job,或者斷時間計. 所以好多時如果唔搵其他工作, 係好難維持生計. 雖然大家都係機師, 但係絕不是人們心目中好型的工作, 因為他們沒有cabin crew跟他們從機上行出來, 在空中沒有豐富的飛機餐, 飛機上大多沒有冷氣, 飛機只有一個引擎(如果engine fail就.......).,但好多人為左這個航空公司飛機師這個夢想, 依然會努力由這些工作做起, 慢慢一步一步, 一個鐘,一個鐘咁累積到足夠小時apply 其他工作.

今次講住咁多先, 下次講下當儲到足夠經驗後, 他們的選擇是什麼!

遇到兩位準港龍的朋友

今日係我第一日在mega box flight experience工作的第一天.

在一個巧合的情況下遇到兩名準備前往澳洲training的準pre qualified cadets. 其中一人仲係這個blog的朋友呢.

原先我是不認識這位朋友, 是他認得我. 然後大家互相介紹.傾談內容最主要係圍繞澳洲training要注意些什麼, 有什麼可以準備等等.

我自己見到佢地係開心的, 亦樂意地分享左好多我在澳洲遇到的細節. 希望他們避免犯上我遇上的錯誤. 因為我清楚明白這個機會非常難得. 我好希望各有機會去澳洲training的朋友都可以最終凱旋而歸. 老實講. 我知道我不能透過cadet programme入airline後, 清楚知道如果想繼續行這條路,將會愈來愈辛苦, 愈行只會愈多障礙. 所以當我每見到有朋友對我說"我得左喇, 我可以去澳洲了" 我心中都只有一個希望就係佢地可以順利完成training順利回公司報到, 然後順利坐上一架民航機, 衝上雲霄!"

實在我唔希望有其他朋友好似我咁遇到挫折, 因為失敗左後, 要香港這行業立足實在係難上加難. 大家都知道香港航空公司不多, 只有4間. 基本上機會比起其他國家及地區還要少(我唯一諗到比香港更少機會的只有澳門). 所以要繼續發展唯有向其他國家入手. 由charter pilot或instructor做起, 慢慢累積經驗. 做instructor, 我做過, 百般茲味在心頭. 有朋友同我講, 坐一架咁細小, 伸腳都難的小型飛機,又冇得去bathroom,坐得一個鐘已經好辛苦. 我卻在這些飛機生活左900小時. 係難受, 冇錯, 教人係有滿足感, 但滿足感的附帶impact就係心力交瘁, 係好難捱. 所以有朋友對我說, 不如做住instructor先, 但老實講, 我已經對教小型飛機產生一種抗拒, 是一種說不出的感受. 所以當佢地問起我去澳洲如何面對training,我可以講,可以提點我都盡量提點佢地, 希望佢地唔好行我這條路. 實在唔好行.

有時我真的發覺做cadet pilot是好幸福的事情.由公司資助去到澳洲接受訓練. 由零飛行小時到畢業時有大概250小時飛行經驗畢業返港, 接受完type rating training後就可以成為民航機師. 佢地在澳洲的努力是不可或缺, 不可以看少這個training,能夠完成training都是了不起的朋友們. 我睇返自己, 擁有他們差不多4倍的飛行經驗, 卻仍要為這個夢想繼續向一條未知幾時見到終點的路途進發, 實在更樂觀的人都會有擔心的時候. 有時搭車, 一個人行路的時候諗起都會有少少唏噓. 我又唔會怨, 因為唔係我冇機會, 而係人地已經俾左一次機會,只不過我把握唔到. 只可以講, 鬼叫自己咁熱愛飛行, 唯有繼續保持樂觀的心態, 繼續向不同地方, 不同人仕探索機會吧, like most pilots said to me"just keep sending out resume, something will happen soon"

anyway, 我係一個對自己的人生好執著的人. 與其放棄夢想, 做其他工作, 簡簡單單過日子, 反而我會倒過來問自己有沒有為自己人生努力過些什麼. 這是為左一個夢. 我永遠永遠都唔會放棄這個飛行夢.

路係崎嶇, 路係難行. 路永遠唔會有絕對的順利. 但係有路行,總好過走投無路. 所以各位在各行各業想創一番事業的朋友. 一齊努力吧.

我的格言係, 只要我尚有一啖氣, 我仍然會為這個夢想進發. 就算到臨終一刻, 我回顧自己的人生, 我唔會感到遺憾, 因為我曾經為自己的夢想奉獻過自己的青春,時間同金錢.

朋友們,加油呀.

僅預祝兩位北美的代表可以凱旋而歸, 前程錦繡!加油呀!

 

拆禮物.

上星期說過話會一齊拆禮物.

份禮物剛剛從加拿大新鮮運到香港.

究竟係乜呢? 就係一份medical form同埋數份加拿大發出的文件. 或者大家都估到喇,

冇錯喇!!我的加拿大移民申請已經獲得初步的approve. 由於不用做interview的關係, 只要在香港完成身體檢查, 又pass的話, 就可以正式得到immigrant visa,拎住immigrant visa,飛到加拿大,正式登陸成為加拿大永久居民(Permanent Residence).

早於上星期一個晚上已經收到委託的律師send俾我的email, 當時心情真係好興奮,o係搵工未有太大驚喜的情況下, 突然知道移民申請得到approve, 突然覺得在黑暗的隧道中見到光明. 因為做左加拿大人後, 我就可以合法地工作(之前都合法,不過係工作證,只可以幫特定公司工作,仲有其他限制). 事關加拿大其實有好多包機航空公司,耐何見到都唔可以apply,因為我唔係加拿大人. 不過只要land左之後,成為permanent residence之後,唯一限制已經解除. 實在太好了.

諗起上年6月的申請,當時並非我自己的意願, 我當時仍然一心一意返香港工作, 話到時KA/CX,應該冇問題, 可以回流, 但係媽媽托朋友搵左個律師, 個律師解釋左,而家申請係最好機會, 因為移民條例經常改, 趁住加拿大需要人,亦有新program招攬曾在加拿大工作的人, 唔好浪費機會, 當係俾多個選擇俾自己,俾多個選擇將來的家庭. 我其實當時有點猶豫, 無可否認我喜歡加拿大的生活, 希望自己的仔女在加拿大讀書.但係由於條例限制, 如果在香港工作的話, 就算得到身份,亦用不著. 所以當時都係十五十六. 但係最終都係apply左, apply過程都亦非一帆風順. 因為份form好多野填, 又要考IELTS試,講起個ielts試真係陰公, 由於我個省冇試場考試,結果要開車到另一個省, 淨係一程都開左5個鐘車, 攰到我!!最慘係回程途中落大雨, 由於安全關係, 要開慢一點,之後又發覺愈揸只會愈危險, 擺埋架車o係一間motel避雨, 足足搞左7個鐘先返到屋企. 返到屋企, 衫都冇換, 野都冇食, 就訓到天光.

anyway,apply左之後, 我都冇理喇.加上當時KA話interview成功左, 心諗應該就算得左, 都未必可以返加拿大定居掛!?我當時真係咁諗, 基於人工不差的情況下, 就算第時要送仔女去外國讀書, 咪靠自己努力搵錢送佢地出國,所以當時根本冇諗過真係會登陸加拿大.
但係天意就係天意. KA o個邊臨門一腳撻Q. 當陣時除左期望o係亞洲搵工之外, 就係希望個移民申請會pass, 我自己心中盤算機會並不大,因為加拿大大把機師, 點會搵個亞洲人做這份工作呢? 根本唔需要我. 所以我一直的心情都係隨遇而安, 得就好, 唔得亦不會太失望. 咪o係亞洲區周圍搵lor.

至於第時immigrant visa出左之後,會唔會真係去移民去加拿大, 暫時看來機會都幾大. 老實說,近來真係搵過好多關於飛的工作. 曾經的cebu pacific,可惜近日收到佢的消息話佢地選擇更好條件的機師. 而香港另外兩間航空公司,亦有溝通過. 其中一間,話i am qualified to be interviewed,可惜並沒有interview schedule. 另一間我同個captain溝通過, 可惜佢地現在有10個人等待training, 所以暫時不可以請更多人. 佢亦提議我o係可行情況下不如返加拿大做住先. 直到再inteview時,call我返香港. 至於內地亦有傾過,不過我前老細遲遲都未有新消息給我.

加上最重要一樣野, 就算移民,成為permanent residence之後, 係有一個限制. 大家都應該聽過移民監. 對於我這個個案亦有所謂的移民監. 5年內, 我要住滿2年或以上. 點解要咁呢? 因為permanent residence 並唔係最高身份, 在加拿大最後身份叫做加拿大公民(Canadian Citizen). 要成為citizen就要加拿大住滿2年以上. 做公民同永久居民分別係咩呢? 以我所知, 最大分別係本passport.要得到加拿大護照, 一定要成為加拿大公民. 而且如果我冇記錯的話,如果頭5年住唔夠2年的話, 不符合資格成為加拿大公民, 第時就算再住夠2年亦唔可以成為加拿大公民. 我想成為加拿大公民除左因為本passport之外,應該尚有其他原因. 我嘗試去找到答案.

所以無奈地,可能我都要一個人返加拿大住. 加拿大生活簡單, 節奏冇咁快, 但係又回到一個人生活的日子, 心裡好難受, 真係. 你要諗下之前7年已經過著咁的生活, 諗住這些日子終於完, 點不知原來只係一個pit stop.休息過後,又要返去加拿大一個人住. 心理上係好難受. 唔係講笑. 加上如果返加拿大, 可做的工作只係一個包機機師, 載10人o個d呢? 並唔係想像中那麼理想的工作, 只係一個step stone. 我並唔係誇張,下次有機會講講工作上的細節大家就會明白.

anyway,能夠得到另一個身份, 點都值得高興,至少可以o係另一個國家合法工作. 但係諗起捱凍, 捱寂寞, 諗起都驚. 唯有靠樂觀,阿Q精神,同自己講這些日子會好快完,好快就可以過更好的生活. 樂觀唔可以改變事實,但可以改變自己的心境.

移民 (一)

好耐冇講過關於加拿大的資訊. 

今次講一講移民.

隨著香港物價上升, 跟收入不對稱, 或者對香港政府施政感到失望等等. 或者會令大家產生一個念頭, 不如移民去外地.

想講移民的高鋒期不得不提上個世紀90年代頭. 當時正正係64期間之後數年, 加上97臨近, 有大部分對香港未來感到憂慮的人仕都選擇左o係97前移居海外, 而紐西蘭, 澳洲, 美國, 英國, 加拿大等地就成為左佢地的理想國度. 無獨有偶, 我身邊的加拿大朋友都係差唔多o個段時間移民去加拿大, 佢地大約4,5歲就跟著屋企人移居海外, 由於o個段時間的小朋友尚年輕, 吸收能力強, 所以學野速度, 以致佢地好多都能操一口流利的英文. 

當然能夠移居海外的,不外乎2種人. 1)有錢人, 2)有技術或知識的人.

現在我屋企人談及這個情況亦好可惜當年沒有趁機會申請移民, 我的爸爸媽媽當年都並非生長於有錢家庭, 從小屋企亦沒有能力供應佢地讀書至大學. 是典型的屋村家庭. 所以到80年代尾, 90年代頭, 組織家庭後, 亦沒有諗到會移民海外, 所以用積蓄買左居屋而沒有移民海外的念頭,但當2003年送左我去外國讀書, 佢地就有少少後悔當年的決定, 睇住加拿大元由1對5, 升到高鋒期的1對8, 佢地就開始覺得早知道這個情況, 當年就選擇移民海外. 不過老說話: 有早知,就冇....啦! this is life.

我又覺得可以趁這個機會談一談移民這個話題. 相信一些準備組織家庭, 或者將來生兒育女的朋友亦可能會感到興趣.

先講移民的方法.technically 黎講有兩種.

1. 投資移民

2. 技術移民.

今次我會約略講下兩者的分別及要點.

投資移民

固名思義係用錢換取身份返黎. 簡單黎講, 需要一筆資金投放於加拿大的生意上. 或者大家會聽到好多靠投資移民移居海外的人, 會去到就買一間唐人餐館做生意. 事實上, 唐人餐館的確係其中一個最吃香的行業, 就說明左點解去到邊度, 都會見到唐人餐館這個道理, 除此之外仲有洗衣店, convenient store等等. 加拿大政府的最終目的係希望你投效資金o係這些城市, 製造就業機會.

技術移民

技術移民,最重要當然就係學歷. 學歷要求普遍至少都要大學學位程度或以上, 學歷愈高, 當然愈吃香. 除了學歷之外, 另一方面當然係技術. 技術可以係醫療, 教育, 法律界, 工程師等等. 全球無論那一個地方都有著人口老化,出生率低的問題存在. 加拿大亦有樣同著的問題. 加拿大為了吸納人才, 會接受海外有技術人仕申請移民, 最終目的就當然希望以這批人才去填補國內人才不足這個問題.

係咪代表醫療界, 法律界等專業行業一定吃香呢? 非也, 其實除左睇學歷同專業技能, 加拿大政府審批一個申請亦有多方面的考慮.

至於詳細就留待下回分解.

至於我自己近來都係這樣, 有一些interview,亦有航空公司的接觸. 最開心的係收到一份禮物, 這份禮物現在身處加拿大到左我媽媽朋友手上, 遲下就會速遞返香港俾我. 應該下星期初就會收到, 到時一齊拆禮物啦.