Saturday, February 5, 2011

正式辭去flight instructor 一職

現在的我, 身在加拿大.


趁新年假期,回加拿大處理一些事情.


亦趁這個機會正式辭去flight instructor一職.


早於去澳洲training前,已經早有這個決定. 當時係以為會入港龍, 所以順便辭去在學校的職位.


當我知道公司不會請我的時候, 我曾經考慮過取消這個決定.繼續返加拿大工作. 不過我有感對亞洲市場充滿信心, 覺得在亞洲區的機會很多, 加上我的instructor 牌亦在1月到期. 所以按原定的計劃回加拿大辭職.


昨天回到學校, 感覺好親切. 好多學生見到我都好開心. 佢地還以為我是回來繼續工作, 有些以前的學生還問我幾時可以從其他instructors 手上接佢地返黎教. 但當我話俾佢地聽, 我今次返黎係辭職,佢地都感到幾意外, 更令佢地感到意外的是我告訴他們我還未搵到工作呢. 不過他們亦告訴我, 如果肯捱,在中國內地依然有很多工作機會.


跟學生傾談一會後, 就入左我的老闆的office(嚴格黎講,我有兩個上司, 女的負責管人, 男的負責出$$). 我首先入左女的office先,因為佢係我直轄上司,有任何事也要向他匯報, 跟她亦傾了很久, 傾下澳洲的training, 學校的近況, 感覺真係好舒服, 佢給我的感覺除了是上司, 亦係一個可以傾計的好朋友. 以前我在閒時沒有什麼野做,都要入佢office傾下計, 吹下水. 佢接受了我的辭職,亦對我說, 如果有需要的話, 學校的大門隨時為我而開, 如果在其他地方找不到工作, 可以隨時返黎. 我聽到真係感到好榮幸, 我亦欣然接受她的建議, 必要時會返學校工作.


之後, 我亦趁這個機會約了我的大老細(負責出錢的老闆). 其實我跟他在工作上甚少接觸,因為他每個月有大部分時間都在內地工作, 每個月只有一,兩星期在加拿大. 有時一個月也見不到他一次. 但係他是一個沒有架子的老闆, 擁有一間飛行學校,但在他身上完全看不到有錢人的特徵, 好親民, 有什麼對學校的不滿的亦可以提出商討.


今次約他見面最主要原因, 就係因為入唔到港龍, 所以約他會面, 相談另一個種的合作方式. So far會面進展係良好的, 現在我需要做的就係自己仍要努力找工作, 同時等待他給我的好消息, 由於他亦不能保證佢可以幫到我, 所以佢仍提議我自己嘗試一下. 希望有好消息吧.


這就是最新的近況. 情況良好.


我好感激你們的每一個留言. 每一個留言都給了我好大的支持,鼓勵.


我感覺我多了好多好朋友陪我一起行這條路, 這條路可能是一條不明朗的路, 但你們仍然作無限的支持,thank you.


新年好. 大家都開心一點吧!


Tuesday, February 1, 2011

緣盡港龍

新年流流, 不過亦好抱歉向大家公佈一個不太好的消息.


上星期三,我收到港龍的通知, 雖然完成training,但由於training的進度未達公司要求, 所以公司將唔會聘用我成為佢地的機師, 換言之, 我同港龍的緣份亦正式畫上句號.


當我收到這個消息的時候,當然係好失望,可惜. 事實上在training的初步的確遇上障礙, 但去到尾段已經證明到我有能力handle intructor的要求. 可惜下最後決定的是公司, 我亦無能為力, 只有正面的對接受這個決定.


對於公司的決定, 我絕對表示尊重. 這是一個商業社會, 任何一個職位都是有能者居之. 如今我達不到公司的要求, 俾淘汰亦非常正確的決定. 我感到可惜, 但亦感到無憾. 我在ADL已作出最大的努力. 問心無愧.


現在心情平靜


當我收到這消息後, 立即打電話返港龍跟進, 希望公司可以重新考慮. 可惜他們說這是他們最後的決定, 亦唔會再作任何考慮.


當掛斷電話後, 我已經100%肯定我跟港龍已經緣盡,所以並沒有太大的唔開心,我係失望,但冇喊, 並唔係我唔重視, 而係覺得喊有用咩? 做傻事亦對事件沒有幫助.


我當時只知道, 當務之急需要用之前計畫左的back up plan. 整個下午, 我打了很多電話, 找了很多行內人仕, 希望可以得到一些意見. 亦apply 了不少海外的工作. 由得到這個消息後至現在大概一星期, 初步收到的回應係正面. 我對自己的前景暫時仍然非常樂觀.


失望係無可避免, 我感到可惜並不是我賺不到第一桶金, 反而係可惜未必跟師兄一起共事, 亦不可以跟港龍正在受訓的師弟工作. 雖然可惜,但係港龍並非這個世界唯一的航空公司ma!我跟公司沒有緣份, 並不代表緣盡其他公司呢. 入到港龍當然係最理想的結果啦, 有穩定的工作, base in HK, 薪金亦不錯.但係唔得就係唔得. 咪當重新洗牌,再黎過lor. 由apply到見工, 到去澳洲受訓, 我的確花了好多心機, 時間,精神,金錢. 講落好似前工盡廢, 但我卻覺得我賺左.


能夠在一個仙都唔洗的情況下, 可以遠赴澳洲受訓,真係有$$都買唔到的珍貴經驗, 在澳洲所學的野, 我相信在其他公司亦可以發揮出來. 就算在那一間公司工作, 咪又係飛機, 咪又係用runway take off, overall picture其實差不多. 所以我反而現在好珍惜這些難得的經驗, 期待用於另一間公司身上.


跟一間公司可否合作, 好多都係天時,地利,人和. 得不到這份工作並非世界末日. 加上年紀尚輕, 雖然將會行的路會比其他人於回曲折, 可能又要再離開香港, 可能又要返到食公仔麵的日子, 可能又要一個過大時大節. 但係我只有幾個字可以說"This is life, part of the game", 每個人的人生路都不同, 我今次要行一路可能更難行的路, 或者沿路會有意外收穫啦. 辛苦咪辛苦lor! 我覺得這是挑戰, i am still young,nothing to lose,輸得起!


我自己覺得人生一定係唔開心多過開心, 最緊要懂得o係邊度跌倒就o係邊度爬返起身. 雖然好多人說,講就易,做就好難, 今次這件事, 令我發覺得並非想像中那麼難, 最緊要係看看自己的心境, 最緊要在無論順景, 逆景都好, 最緊要係撐自己, 別人所講的有限, 自己撐自己先係最緊要, 你問我, 可能又要離開香港感覺點? 當然係難受啦, 但係難受都要接受, 我的確好抗拒一個人慶祝新年的日子,但係為自己前途,夢想, 這些個人感受,絕對值得"希生". 而家又唔係成世冇得過新年, 再要捱凍,捱寂寞, 我仲頂得住. 我係一個不易認輸的人. 愈困難, 愈有意義, 因為到時如果成功克服的話,成功感將會好大. 我已經準備好重新上路.


我之前講過單數年份, 係我自己人生最運滯的年份, 估不唔到, 今次開口中, 新一年未夠一個月已經俾個咁的消息我. 人生就係咁奧妙. 咪反而覺得未來的11個月更具挑戰性, 我不信宿命,我不信絕對. 我信歷史係由人類去改寫. 就看看我可唔可以用這11個月將一件好負本的事, 變作一個美麗的終結.


與此同時, 我想向大家講聲對不起. 令大家感到失望. 我的確要負上無可避免的責任. 我希望大家給我一點時間, 我會繼續努力, 一定會達到夢想. So far 客觀和主觀情況都是樂觀的. 希望各位學飛的人可以為我實現在香港飛行這個夢想.飛埋我o個份.


我亦深信不能跟港龍合作,並不代表我是一個不合格的機師, 只是時機尚未成熟. 只要我花多一點時間, 吸收上一次失敗的經驗, 下一次只會更好.


明天不一定好, 好的明天一定會來.


失敗已成定局, 隨著1月份的過去, 我都唔會再提這件事了, 我不會感到慚愧, 出街的時候, 依然會抬起頭做人. 放心吧, 我真的沒有事.


僅祝大家新年快樂, 身體健康. 最緊要是開心. 開心並不是一個客觀的事實, 是一個主觀的心態. 大家今年開心d!


 


 


Thursday, January 13, 2011

有相睇

終於返左黎,可以upload d相上黎. 唔講咁多,睇相先. 下次先打埋Part 2

第一次過equator,梗係要影低歷史性時刻啦

at the airport, waiting for cab. 

The cab driver wasn't sure how to get to Parafield so the security guy joked

"dun worry, they will call you when they get to Melbourne "

到左喇 

勁重的baggage.

Adelaide第一次出遊, 梗係先行downtown.

由Parafield 去city的火車站.

火車內

先到Chinatown 

 

then actual downtown area

Some pictures of the aircrafts.

Dunchess 

Diamond DA42

睇住咁多先, 下次再加相.


Saturday, January 1, 2011

2010年的總結(1)

新年第一blog, 僅祝大家新年快樂, 乜都係假,最緊要開心. 鍾意飛的朋友, 祝你地今年內達到自己的理想, 一飛沖天.

2011的開始,代表2010的告終. 歷史話俾我聽, even years 係利我. 相反單數年往往有阻滯. 雖然咁講,但係歷史係人類改寫,所以2011年亦可以係好年.

2010年的確係人生轉變最大的一年, 經歷最多, 辛苦最多. 12個月,就好似坐過山車,由年頭的低谷到年尾達到理想, 真係百般茲味在心頭.

簡單咁講, 2010年的確係最辛苦的一年. 少有地,在一年內我會來回加拿大咁多次. 實在有太多事情需要處理,不過things always happen for a reason. 愈辛苦,愈有代表性.

在年頭的時候, 我返左香港, 其實係等某一間航空公司的結果, 不幸地個result係negative, 當時其實非常徬徨, 一心以為返香港就業的機會會幻滅, 最終透過一位好朋友的介紹, 他對我說他的airline正在請人,叫我send個email,將成份application, certificates copies等send到對方公司. 最終亦得到該公司的回覆叫我簽好一份application form,以最快的方法交回, 由於我實在太想留o係香港, 諗都唔諗,填好份form, 第朝親身拎上其公司放低俾公司職員, 又驚寫d字唔靚, 寫左十幾次, 浪費好多紙先填到一份自己滿意的application form.

但係期間我發覺原來我持有的加拿大license,尚差一個fozen license先可以滿足香港民航處之換牌手續, which is fozen ATPL exam completed. 因為咁我翻查過民航處的regulation,嘗試下用最少時間,金錢去考到這個exam. 結果發覺冇計, 一定要返加拿大考, 但係加拿大的規定係要合資格考ATPL written exams,一定要有750 hrs + valid instrument rating. 當時的我其實感到前路好多障礙, 事關instrument rating,我有,但係會到5月到期,當時係3初, 而我當時擁有650小時飛行經驗, 距離目標750 ,差一百小時. 最理想的解決方法就係在instrument rating 到期前累積夠750小時, 即兩個月內飛夠100個鐘, 因為如果到5月都累積唔夠750個鐘,而我的instrument rating又夠期的話,我要renew 返我個instrument rating,先可以考atpl written exam. 簡單黎講, 要考加拿大atpl written exam 一定要有: valid instrument rating+ 750 hrs, 缺一不可. 一來我真係唔想renew 個instrument rating,因為renew 一次其實要洗好多$$, 差不多3,4千HKD, 加上考ATPL又要另外千幾HKG, 都幾吃力,加上要一邊返工, 一邊溫書, 體力上要求的確好大,所以免得過我都希望可以在5月前累積夠750小時.          

問題黎喇! 2個月內累積100小時可以嗎?能力上可以,但實際上其實不可.因為當時的我, 其實向公司申請停薪留職,以方便我可以專心返香港interview, 而公司對我非常好, 同我講" you can leave as long as you want". 我真係好感謝前顧主的體諒,無私地俾我可以攞正旗號要返香港見工, 而且個leave 係沒完沒了. 因為我當時的確俾唔到一個確實日子,幾時會辭職或繼續工作. 所以當我發覺要累積100小時flight hrs的時候,我第一時間send email返加拿大同老細講話俾聽講, 個情況係咁, 希望公司可以俾個機會我復職, 令可以借instructing,累積夠750小時,然後考埋ATPL,以滿足香港民航處的要求. 最終公司得到的答覆係"因為當時學校亦有過多instructors, 而且中國send黎的學生亦少左, 擔心就算我返加拿大亦未必可以分配到學生俾我", 收到個reply之後, 佢話可能返到加拿大之後亦要等一段時間先有學生俾到我. 

經過考慮後, 我覺得這個方法始終係唯一方法, 所以就o係3月中的時間返左加拿大, 進行一個近乎不可能的任務. 返加拿大也不是太差, 至少我可以飛返, 又可以享受加拿大的生活. 返到學校第一時間跟老細會面. 我地傾左一陣計我發覺我老細真係對我超級好, 原來佢已經計劃左俾一個學生我先, 之後待4月就新一批學生來的時候,再俾多兩個, 因為我地計算過,如果有3個學生跟我的話, 我就可以累積夠100小時或以上, 我真係好感激公司對我的信任,照顧同埋幫助,如果唔係, 我肯定無辦法累積足夠時數. 更令我感動係公司對我能力的肯定, 因為自此之後, 老細繼續俾好多學生俾我教, 在其他instructors只有2,3個學生的時候, 我卻有多達7個學生同一時間跟我, 令可以肯定累積到100小時之餘, 亦因賺多左$$,可以儲到$$ renew instrument rating同埋atpl written exams.

另外, 佢亦對大老細傾過的情況, 在annual review的時候, 大老細向我提出有冇興趣加入內地的航空, 佢知我來自香港,問我有冇興趣試下加入深圳航空. 佢話深航係我地客戶,只要向佢地引薦的話, 應該冇問題. 可想而知,邊個行業都係需要connection. 當然我聽到這個建議後, 係開心的, 但最終我卻婉拒左老闆的好意, 因為雖然內地的航空業正在發展當中, 好多制度尚未成熟, 特別係人權問題, 員工權益問題上, 仍然係處於落後的階段,加上我知道如果真係加入內地航空公司,我將要簽署一張比較長的合約, 而工資又會比香港及其他亞洲國家少,所以我跟老闆說我會考慮,不過暫時仍以香港作為首選,而佢亦不感介意,只係同我講如果真係有需要幫助的話, 就向佢提出. 對於公司的照顧,我真係感到好開心, 不單俾機會我繼續飛,更可以推薦我去其他航空公司工作.

之後......就返下次再講講吧.最終有冇去到內地見工? 點解會去左龍仔? 留待下回分解.            


Wednesday, December 29, 2010

在機長家中短聚

話說雖然我跟另一位partner係來自pre-qualified cadet course,但係我地o係adelaide絕不lonely,因為有一大班DA恐龍仔正接受緊14個月的training,既然大家來自同一公司,梗係一家親.無分你我. 食飯坐埋一齊, x'mas 都係成班一齊過. 非常團結.

當中有一位cadet係老外黎ge,佢爸爸原來就係公司的training captain ,仲要係seniority勁高o個隻. 叫得做training captain, 即將來就係自己上司,聽到都有點壓力. 佢本身係澳洲人,家在adelaide,但曾經舉家到香港居住,所以其兒子亦擁有香港ID,that's why he's qualified to apply for cadetship. 今次機長特登x'mas放假飛返adelaide同屋企人過x'mas,亦好友善地邀請我地成班恐龍仔去佢家作客. 當初聽到其實幾有壓力,話晒係將來老細,唔多唔少都需要一點點的拘謹. 亦要著得比較整齊, 心情其實同見工冇乜分別.

結果我地一行13人(其中一人要飛,未能出席) 浩浩蕩蕩, 兩手空空,(除左夾份買左支酒), 開車去機長家食晚飯.

原來佢屋企就係o係海邊, 一入到佢住o個區已經感受到咩叫做貴氣, d屋企靚到呢..........間間都有返咁上下份量. 佢間屋亦都係非常之咁grand, 好正, 好大, 總之就正啦. 一入到去, 已經感受到o個種溫暖, 係從屋裡面的裝潢, 設計散發出黎, 入到去, 已經見到機長在門口迎接我們, 咁當然我地都要逐一介紹自己, 感覺同返到interview 冇乜分別, 不過傾落captain真係超無架子, 除左為我地成班餓鬼安排BBQ,更親自到backyard 燒埋俾我地食, 其間又跟我們每一個人傾下計,講下佢自己工作等等. 佢亦好細心咁問我, 對training有咩意見, 有咩可以幫到我地, 就好似父親咁(明白,係有點肉麻),但係感覺真係差唔多, 佢會好願意逐一了解每一位cadet 的background, 然後又會分享下佢o係公司咁多年的工作經驗, 教我地第時要點樣裝備自己等等. 感覺非常舒服,一下子個氣氛由interview變做落pub傾計,差無幾!

講左咁多, 不如講下食咩? unlikely BBQ in HK,香港BBQ特色係咩都可以燒, 低相對上, 外國比較簡單, 有腸啦, burger, 同chicken wings, 各有各特色啦. 我自己真係冇乜所謂,食得落肚, 飽, 唔會肚痛就ok.

食完BBQ之後, captain就做左導遊,帶左我地行海邊, 去左一個我諗adelaide幾聞名的beach,亦係Miss Chan Chan在我臨我之行跟我推薦的hanley beach. Miss Chan Chan,你的確冇介紹錯, 我去到沙灘, 我ge第一個感覺係"嘩, 有冇搞錯啊? 靚到咁?!!" 真係並非誇張, 的確個沙灘真係好正, 用返一個比較官腔的形容詞---水清沙幼. 除左對鞋, 踏上d沙度, 感覺好似行緊地毯咁, 軟林林咁. 我地沿住沙灘邊一路行, 一路吹下水咁, 我其實都幾8卦,問左好多關於公司的問題, 例如新航點, 擴展機隊,第時可能會飛咩機先等等....咁當然我o係度係唔可以透露咁多啦. 事關好多野都未確實. 不過就幾有趣ge.

anywayz,行完沙灘之後, 就返到機長家中,返到去先知,原來佢的太太已經為我地準備左飯後甜品-------cake, 個cake係好食, 其實又好難形容個味道, 我淨係發覺好好食, 所以食晒, 但係你家下問返我究竟有咩野o係個cake入面,我又真係答你唔到,我淨係記得係啡啡地色, 有一堆白色ge cream on top,有一舊strawberry, 同埋個邊係有一堆白色的硬野, 事關我真係唔知咩黎. 不過口感幾特別.可能會問, 有冇相啊??? 我又唔好意思o係人地屋企影相,話晒人地屋企係有人地私隱, 影左相之餘,仲要放上網又唔係幾好ge,所以唯有靠大家的幻想能力喇.

anywayz, 就係咁,我地好愉快地過左一個晚上, 不過呢, 本以為可以返屋企立即訓覺,咁就錯喇, 事關今朝有一個simulator training, 模擬由fukuoka to osaka to fukuoka turnaround. 所以尋晚返到屋企之後就要prepare個flight, 就係咁搞到好夜先訓. 今朝又要好早起身prepare,所以家下其實都幾攰.

所以不如就講住咁多先.

我有嘗試upload相俾大家睇下個沙灘,但係internet問題,upload過幾次都話係error,唯有等我返香港一次過upload晒所有相上黎俾大家睇啦.

gd night.                                                                                                


Saturday, December 11, 2010

Adelaide 的2星期

不經不覺(老土開場白)已經到左adelaide兩星期.    首先到adelaide的感覺就好似返左加拿大一樣, 空氣非常好,
空間廣闊, 要講好多英文, 握好多次手, 食fried chicken etc.    Overall,感覺非常唔錯.     今次亦都係我首次去其他flight
school,
發覺這間flight school (FTA)之所以聞名於海外真係有理由, 間scale大不止, 好多野做得好完善, 好有要求, 好有制度. 我從牆上的相片發覺FTA為不少airline train過好多機師出黎.South Africa Airways, Malaysia airline,
Singapore airlines, Qantas ,Emirates (EK), JAL,vietnam airline etc.
當然不少得CX
and KA.    
同埋instructors ge背景亦非常資深,有retire military pilots, navigators, airline pilots等等.
而帶我飛的instructors就係以前South Africa ge air force,我今次真係賺晒. 除左型不止, 成個高版Richard Gere咁. 好有機師味道(即係一眼就睇得出係機師), 做人要求好高, 做野有條理, 從佢著衫o個種整齊程度可見一班. 跟佢飛左5次, 真係畢生受用. 



 



黎左兩星期,每一日都咁忙, 加上唔好彩地病左,
睇兩次醫生,先搞得掂,
講起睇醫生,睇完第一個醫生,簡直睇左等於冇睇,
你估佢開咩藥俾我?
vitamin C,使立消 etc. 我明明病到7彩, 但一d
真正的藥都冇俾我,
結果又要搵第2個醫生,
今次個醫生幾好,
話我有URTI,所以開左d
唔會影響飛行的抗生素俾我,食完好好多.     頭2星期要做的係flight grading,即係test下你有冇能力飛一架從未接觸過的飛機,
今次架野都幾難飛,
DA -42, 從要就由diesel engine 轉做avgas engine. 加上係glass
cockpit,我從未接觸過, 所以開頭都有點困難, 但最終都Pass左,
Pass flight grading好重要, 因為如果我pass唔到,
我今日就會o係香港出blog
ga喇,冇得留o係Adelaide. 因為公司規定要pass左flight
grading先可以繼續training. 雖然話之前flight grading死亡率係零. 但係這個世界咩都有可能,
所以要輸的機會依照存在.    尋日飛完, 我同partner等宣判的時候,
o個半個鐘幾難捱,
每一秒都好似過得好慢咁.
當program
manager話"the decision has been made to continue your
training" 我倆真係開心到痴左線, 近乎激動落淚.因為如果真係fail,真係要執包袱,
返香港,
咁就玩完.    我這7個flights成績算不錯, 5分滿分,
我有好多air
work都有4分, 有5,6個滿分, 其他都有3分,
亦有3,4個只有2分,2分不是差,是合格.
但基於唔知個評核準則係點,
所以梗係有d擔心,
正如一位blog友的名言"一日未關機門,一日都有機會被人offload".所以真係要等到宣判完先相信個結果.    之後帶著一個非常開心的心情參加我的好友的畢業禮, 佢係國泰cadet,
昨日公司為他們舉行盛大的畢業禮,
有好多機長都有到來參與,
我亦為這位朋友感到非常高興,
因為基本上大家行的路都係差唔多,
由推飛機,
捱凍,
到instructor,
就instructor到cadet
pilot. 最終見證到大家一齊可以返香港飛, 真係非常難得. 眾所周知要入CPP其實真的不易,
佢由第一次apply,到今日畢業,足足有差不多8年時間.
期間fail過3次,
但每次fail之後,佢都尋找進步空間,
期待下一次的interview,昨日佢終於可以享受咁多年努力的成果.    所以話傳聞中,一生人只有2次機會亦非事實之全部.
只有每次apply都比之前一次在qualification上有進步,
公司或者都會考慮.
努力喇,各位.     anyway,講住咁多先, 明早briefing,下次再談.


Friday, November 26, 2010

下一站: Adelaide

尚有不足24小時, 就會離開香港喇.

要執的都執晒.

要準備的東西,已經準備及安頓好 .

包括托當地朋友幫我買左pre-paid sim card, 亦已為我check左我未來幾日的schedule, instructor ge background等等.

可做的已經做了. 一切都ready,如箭在絃!

不少朋友,親戚都有問我同一個問題, 心情如何?

老實講, 我知道這次機會非常難得, 但壓力暫時不大. 我對自己有信心, 我相信自己的能力, 我相信只要每一次飛前, 準備充足, 唔明就問. 到時應該可以達到學校要求.

心理上支持亦非常重要, 我永遠相信其他人可以做到, 自己都應該爭氣,唔好令所有支持我的人失望. 加上, 公司揀得你, 即係你的能力有一定的肯定. 所以現在的我對未來的training有一定的信心. 不過我仍然會謹慎處理每個flight,絕對不會讓勝利沖昏頭腦.

不過肯定的一樣野,就係到時要放好多時間在書本上, 可能係有生以來, 最努力的一次. 但係值得ge. 唔辛苦,邊得世間財呢!

總之大家放心, 我一定會滿載大家給我的期望到Adelaide. 作為精神上的花旗參. 攰的時候,上黎睇返你地的留言, 就會充滿力量!!

成敗得失係其次, 最緊要問心無愧. The god will do the rest.

最後僅祝一位blog友, 明天亦是她新婚的日子, 祝這對夫婦白頭到老, 永結同心

Adelaide見喇,各位!