Monday, December 28, 2009

又再上路@Halifax airport maple leaf lounge

又再上路, 由moncton 經halifax 去toronto.

而家o係maple leaf lounge食下野,internet surfing,等轉機.

第一次坐business class(air canada call it executive class). 有d期待. 本來冇諗過坐executive class,但係由於econ class賣晒, 同埋air canada網上訂票, Lowest price of the day竟然可以揀executive class,咁梗係唔放個這個機會. 個票價同平時econ class一樣. 勁好彩, 其實air canada咁做都理解. 因為我尋日先買張機票, 算係Last minute,與其吉左個位, 不如平d賣出去.

第一次入maple leaf lounge, 個格局非常decent. 好舒服,有高台, 有crouch, 有wireless 上網,有電腦任用, drinks(alcohol)任飲, 又有snack,好舒服.

唯一一個問題, upload相speed好慢, 我落到toronto先放相上黎,請見諒.

好喇, 差唔多上機. 到toronto再傾過, c u!!   

                                    


Sunday, December 27, 2009

今日,我真的感動了.

今日的行程係繼續去我所居住的地方搬走餘下的物資, 然後將有用的東西帶返香港. 

而當中最重要的行程係去探一探我班學生. 一群令我感到非常驕傲的學生.

事關有部分已經差不多完成training,準備返國, 下次要探佢地, 除左要返內地之外, 仲要走偏大江南北, 因為佢地本身來自不同的airline.所以趁這個機會, 探下佢地, 傾下計, 鼓勵佢地返到中國,一樣要繼續努力.

入到宿舍, 好多學生都好驚訝,因為事前我冇話過俾佢地聽我會返黎. 從和他們傾談期間知道各人都表現得好好, 有些已經差不多返國, 有些進度唔錯. 特別有一個學生, 我記得我初初接收佢的時間,佢的表現真係好差, 英文不好, 懶惰, 俾我話完,仲笑笑口. 但今日傾落, 原來已經拎到CPL, 我記得當初有朋友同我講, 叫我放棄佢, 直接同老闆話佢能力不達標. 但係我真係非常頑固, 我覺得沒有做不到的事情, 老實說, 論能力, 他真的非常平庸. 甚至可以說below average. 但係我知道令他做到一點事, 並非冇可能, 結果我終於Send到佢first solo(期間真的不知俾他嚇死幾多細胞,驚險場面一浪接一浪), 但總算係成功左一半, 之後因為我太忙,太多學生, 不能夠經常同佢飛, 所以判左俾其他instructors.而他的名字叫austin, 如果大家仲有印象, 應該記得我曾經談及過這個學生. 今次見到佢的成功, 真係非常感動,好在當日冇放棄這個學生. 事實證明,當日決定非常正確,過程係勞氣, 驚險. 但值得. 不是金錢俾到我的滿足感.

今日我真的感到非常開心. 佢地係最成功的學生, 我為他們的成就感到非常驕傲與自豪. 好多謝這一群對我的信任, 相信我可以帶領他們成為出色的飛行員. 從他們的字裡行間, 感到非常感概, 想當日的辛勞, 係冇白費. 效果更比預期好. 想當日, 屋企叫我唔好做, 太危險, 應該返香港, 但我堅持, 因為我太鍾意飛, 我覺得只有o係飛行先可以搵到快樂. 在空中飛行的奧妙感覺, 我真的從其他活動中找不到. 雖然返工期間真的感到疲累, 不順利的時候,感到沮喪, 但今日一會, 已經將這些負面的回憶拋到海王星lu!!

我臨走前向他們承諾, 我一定會返中國坐佢地揸的飛機, 作他們的乘客. 自己可以飛固之然開心,但可以見到他們接載我上天空, 此刻無價.

instructing係一份有意義的工作, 但係我的目標始終係airliner的機師,所以係時候move on to another stage if everything goes well.

             



認住佢地, 佢地分別來自南方航空, 深圳航空和廈門航空的飛行員. 信我, 他們將會係出色, 優秀, 專業的飛行員, 我聽過d人話內地機師這樣不好,那樣不好, 但相信絕不會出現在我的學生身上. 我絕對樂意將自己的生命交託於他們的手上.

thank you all of my students, i am really proud of you. you  guys make me believe what i am doing now is not stupid. you guys brightened my life.thousands of thanks. 

Please keep it up, have a successful career back in China.

     


Friday, December 25, 2009

不辭而別之回到加拿大

轉轉接接,又返到加拿大. 不過今次只係短暫停留, 下年1月中返香港

其實這個決定黎得非常急, 係上星期5先決定返加拿大處理一d公事.

由於香港方面最新消息係叫我1月先call佢地, 而張ticket又夠期. 所以決定不如趁個假期返加拿大搬屋,同埋搞d公事.

在離開香港之前, 我有資訊過我加拿大的老闆,問佢不如我返加拿大做住野先,等有消息先香港, and that's what she said in the email

"We are not short on staff and if you think there is opportunity there I suggest you remain in Hong Kong and continue the process.

Good luck, Merry Christmas and keep me updated."

就係咁. 我就決定返加拿大搬d野走,因為自從返左香港之後,一直交緊"吉"租, 同埋cell phone, 而每個月要俾$500 加紙, 非常破費. 我諗住搬d野either 去garage 度,或者放o係朋友度, 我搵個D garage, 每個月只需俾70蚊. 一個月慳400蚊到, 兩個月慳800, o個度計起差不多5XXX. 仲貴過我到時返香港張來回機票.不過呢,之所以張機票咁平, 係因為有兩程機係用飛行里數換返黎. 勁抵坐.

結果12月24日就孤身上路. 本來諗住o係機場打兩隻字, 好衰唔衰胃痛.本來諗住頂得下. 但入左閘後就愈黎愈痛. 我有諗過去醫療室, 但我驚入左醫療室,隨時miss左班機, 所以就周圍搵milk, 因為聽講milk可以令個胃冇咁痛. 如是者,周圍搵鮮奶, 但係入面原來冇7仔, 但當時真係勁痛. 每提腳都勁辛苦. 最終搵到burger king, 諗住早餐應該有milk賣喇, 點不知都係冇, 結果過左去burger king隔離o個間野(到而家都唔知o個間賣乜,一來當時個胃勁痛,2來冇心機去留意), 淨係問佢有冇奶賣, 點不知真係有bor,但貴到....22蚊一細杯. 不過好過冇. 坐低左飲完, 抖下又真係好左d. 以防再痛, 去埋萬寧買胃藥. o拍左兩粒先上機.所以咩相都冇影過.sor!!!

一上機,立即訓, 訓得勁舒服, 時間過得勁快. 一醒來已經係機程的一半, approaching緊alaska.

不過最終都影左d相.

  

   

   

又回到會落雪的地方, 見到已經唔想落機.

今次係坐continental airline直航newark.

去到new jersey(new york)再轉機返加拿大.

    

未有耐上機, 周圍行下先.

                               

Welcome to NYC


俾你睇下內陸機之--------至"hea"的飛機餐.

一包chips, 一個chocolate bar,一包source,一個turkey/ham sub.

特別之處, 唔好以為係佢serve你,而係佢推架車黎, 自己拎.勁自助. 正所謂"help yourself".   


個sub勁Q版. 我食兩啖已經冇晒. 勁d外國人點算呢? 當然係再來一客啦.

以前我對lee d sub好反感, 但自從o係加拿大住左咁多年之後, 咩都慣晒, d肉凍冰冰咁,但心諗, 有得食已經好好喇, 有時坐內陸機, 慘情到淨係派cookies and drink.


     

in-flight drink.

由於東岸近來天氣都好穩定, 成程機都有turbulence.訓唔到. 就係咁經過差不多2個鐘機.終於返到加拿大. 又凍過............

              

 

空無一人的機場. 平安夜, 的確好平安.

   

聖誕樹也感到非常孤獨.


由上機一刻去返到加拿大, 足足20個鐘, 非常的疲累.

一去到機場, 真係感受到真正的凍..

我朋友搞笑話, 返到屋企, 開雪櫃, 你唔會知道個雪櫃係咪work,因為出面同外面一樣凍.

真係凍. 好在只係留兩個星期, 下月11號就可以返到亞熱帶lu!!


下次再談,差不多要食早餐.             

                                    


Wednesday, December 2, 2009

香港生病了.

近個月來, 因為公事引致無暇or mood 去update個blog, 趁這件公事有未有任何新增進展. 寫下野先.

本身都冇乜意欲去寫野, 但今日的一件小事, 決定寫出來, 好讓大家一齊去討論下.

自9月頭返到香港,我自覺我未完全融入返香港的生活.

有幾件事, 我發覺我仍然未接受到, 就講出來大家有冇同感. 事件係關於某部分香港人的行為.


粗言滿天飛

首先, 我自己唔係一個講粗口的人, 從來都唔講, 反而聽到粗言污穢語時, 會比較反感同無奈. 今次返黎, 唔知點解發覺lee個風氣非常普遍. 猶以一些年青朋友, 這風氣都幾盛行. 記得有一次同朋友去海洋公園玩, 排隊期間, 見到一班後生, 講野其間夾雜著無數的粗言, 明顯佢地係中學生,甚至乎小學生, 因為佢地身上著住PE衫, 應該係學校旅行, 從他們的臉上, 佢地好似覺得冇問題, 理所當然咁. 講都算喇, 仲要調高個聲調, 好似要俾身邊的知道自己講ge野咁. 心裡只有慨嘆.

另一件事, 發生於上星期六, 話說我去KFC買野食, 排我後面的係一群工人, 本來都catch 唔到我的attention,但係佢地一到我後面, 就高聲地講粗口. 真係好唔舒服, 佢地又係旁若無人咁, 又再一次的十分無奈. 我明白香港有言論自由, 但當你享用你自由的同時, 又有冇去考慮或理解下其他的人感受呢? 你有你的自由去講你想講ge野, 同樣地, 其他人亦都有自由去享受無污染的環境. 如果身邊有小朋友, 佢地更可能會有樣學樣. 加上, 從言論中, 佢地都係有家室, 你係咩人, 你自己的小朋友都係o個類人. 最終害埋自己的下一代.

一句thank you/sorry 的價值

在加拿大的時候, 我習慣左, 如果出入室內的時候, 如果有人隨後準備出去, 或者有人準備入內, 我會hold住對門. 等埋佢地. 返到香港我依然會咁做, 但係, 佢地唔會appreciate, 行入去就算, 一句thank you都冇. 講真, 我唔係為左你句thank you 而幫你hold 住對門, 不過你如果有教養,讀過下書都知道咩叫做禮貌. 你唔講thank you,我又唔會痛, 又唔會身痕, 只不過我會覺得講一句thank you,唔會浪費你好多時間, 咁都做唔到?

另外, o係香港, 人多車多, 有時無意間, 不小心撞到對方非常之咁平常, 但係經常性見到的就係撞到人之後, 係唔會講sorry,they just walk away and pretend nothing happened. i was like.......what's going on with these guys??


一人讓一步,可以嗎?

唔知大家搭地鐵時候,有冇發覺, 每次車去站後, 廣播一定會提醒大家, 請先讓車上的乘客落車. 但其實有冇人真係做到?? 我發覺門一外, 在月台的人,好多時唔理有冇人落車都好, 總之就諗辦法上左車先算, 我自己當然唔會咁做, 我發覺, 就算等完乘客落車之後, 地鐵其實係俾足時間月台的乘客上車, 無需要同人迫. 如果你唔讓人, 人地想出, 你又想入, 只會做成人撞人. 同埋就算touchwood,上唔到車, 等下班車, 只需要1-3分鐘, 而家的地鐵效率已經十分高, 一,兩分鐘o係你一生的幾十億分鐘裡面, 又何價呢?

又好似香港駕車咁, 往往會大家鬥爭路, 又唔打燈cut線, 想cut線, 佢地的第一時間, 除左睇traffic 之外, 就係將個車頭申過去隔離線, 好似俾個warning你, "你唔好行埋黎, 你行埋黎, 撞到我, 你唔好彩咋". 或者文化差異, 我留意左好耐, 香港好少有司機真係會讓你cut線,或者就係因為這個原因, 令到部分司機明白, "機會係要自己爭取的" , 唔伸個頭出黎, 係永遠轉唔到線. 所以我雖然有香港車牌,但係爸爸同我講, "你唔好o係香港駕車喇, 你太nice, 以加拿大態度駕駛, 你永遠都唔會轉到線, 你永遠唔會等到人地讓你的時候" 同埋, 香港路窄, 人,車爭路, 好多時遇到人衝出馬路, 稍一不留神, 就會引致意外. 始終部分人唔會遵守交通規則, 有路就會過, 唔一定會o係燈位過馬路.

 

讓座給有需要人仕

觸發我今日打這篇blog的原因, 係因為今日o係巴士上發生的一件事. 話說今日搭巴士回家, 3,4點時間, 在旺角上車, 個巴士算係size比較細小的一款. 車箱比較細, 窄. 而今日比較多老人家上車, 我自己的習慣係, 除非架巴士好大,或者明顯上有多餘位置, 否則我都會選擇企. 反正香港有幾大, 就算企半個鐘都唔過份. 所以今日如常, 我企左o係近窗附近,費事阻住通道, 初時都還好, 每個老人家都夠位坐. 但去多兩個站之後, 就發覺多左長者上車, 咁都有人仕選擇讓座, 但係但始終唔夠位座, 遺憾係唔見有其他人再讓座出黎,其中一個好心人諗讓座出黎, 點不知佢一離座位, 就俾一位o係婆婆之前的年約50歲女仕以8秒9 破世界紀錄的速度捷足先登. 那個婆婆和o個位有心人都感到無奈,亦做唔到任何事, 該.世界紀錄保持者的態度係令你都費事同佢嘈o個隻. 結果有另一位婆婆見義勇為, 選擇自己讓位比該位婆婆, 更直言"唉, 連d後生都唔讓位, 我見到你年紀比我大, 等我讓俾你啦." 語帶無奈. 受惠的婆婆話"我80幾喇," 讓座婆婆話" 我75喇,我一睇就見到你年紀比我大!" 跟住始終冇人再肯讓座, 結果佢唯有企o係我身邊, 仲問我,佢會唔會阻到我tim" 真係好好的老人家.                       

anywayz,講完, 只不過自己的不吐不快, 並無惡意針對其他人.

只希望這個社區會多一點笑容, 多一點忍耐, 多一點將心比己. 人與人之間就自然唔會有太多紛爭.

你現在幫左人, 話唔埋將來受惠的, 係你自己. 

我知道一個人的說話唔會改變到全部人的睇法.但只希望這些不好的風氣唔好再惡化落去.

至於近來忙的公事,有機會再向大家分享.

take care, guys and girls!                                             

                      

           


Tuesday, October 20, 2009

祝早日康復

祝我一位朋友早日康復.

佢最近不幸受左傷.  

希望佢可以早日康復, 重新投入工作吧.

take care!   


Sunday, October 11, 2009

一日內, 由開心到感動

過去的星期五, 我走左上深圳.

去左深圳機場, 皆因深圳航空係我地的clients. 我地亦有學生完成左training返左深圳, 所以順道上去探一探學生, 同埋睇下間公司的operation.

原來o係9龍站有車直接上寶安機場, 非常方便.

3年內第一次返內地, 感覺係d司機的技術非凡. 非常之咁令人驚訝.算啦. 一上車,已經扣上安全帶. 就算撞車都唔會太傷,哈哈.

大概90分鐘後,到達深圳機場, 好似返到自己的office一樣. 好多飛機take off and lands. 由於約左另一個instructors,佢遲到, 唯有自己周圍行下.

個機場個scale當然唔係特別大. 國際航線唔係特別多. 同埋燈光比較暗. 大多內地的airline. 總括黎講唔錯.

無聊地行, 到差唔多時間,去左arrival hall 附近的一間m記等我個instructor frd. o係陣, 緣份就到了.......

竟然俾我撞到我o係加拿大教過的學生o係arrival hall行出黎,估你唔到, 緣份lee家野, 真係好奧妙, 加拿大見完, 竟然o係中國內地的機場撞返自己的學生. 原來佢armarm o係成都,家鄉返深圳, 準備第2日返公司報到.

跟住無奈, 另外兩個學生又到了, 兩個學生都係armarm 從家鄉返黎,一個山東, 一個雲南. 待我個朋友到左之後, 就一群人一齊去公司的宿舍.

深圳航空o係機場有專車到公司.

就係咁, 就入左公司度睇下, 個學生又介紹左間公司, 邊度係flight dispatch ,邊度係d full motion sim, 邊度係整飛機餐的地方等等.

由於始終人地地頭, 我唔敢影相同周圍走. 不過都幾大開眼界.

待d學生放低行李之後,我地就去左flight dispatch門口等車出市中心, 期待見到好多cabin crew and pilots準備出機場, 班機師真係好cool, 好整齊, 亦都係好有規矩, 機長行先.

我地就坐車去左南山, 原來o個度又有深圳airline 的宿舍, 不過貴一d . 路上, 發覺交通真係一d都唔好, 經常塞車.

                                     去到南山, 又撞到一d前學生,係冇直接教過, 不過曾經傾過下計.因為我o係moncton學飛的時間,佢地曾經過黎加油, 知道有一個曾經係國航的cabin crew,非常有禮貌, 英文好好, 佢原來已經飛緊737.

之後佢地帶左我地去小肥羊打邊奴. 第一次去小肥羊, 一人一奴, 自己點食咩. 大家聚會,傾下計. 講返以前training d趣事, 幾開心. 不過由於國內唔係禁煙, 所以有兩,3個學生一傾,一路吸煙, 我同另外一個instructor都叫佢地戒, 但係成效就.......吸煙本身就係唔健康, 加上機師,身體健康最重要, 希望佢地到時會明啦.

最精彩係傾到內地的飛行文化, 好有趣, 好大開眼界, 例如, 如果麗江機場因為有兩座山,o係附近, 所以晚上係唔俾飛. 同埋原來佢地而家係初級, 唔可以飛國際線住, 同埋, 佢地每日的schedule 其實日日差唔多. 好似有個學生話,佢多數每日都係深圳> 北京> 大連> 大連>長春> 深圳, 一日內環遊中國. 佢話好攰.

之後食完飯,佢地就話去蛇口飲野, 聽就聽過, 不過未去過. 原來都幾有外國feel,幾靜. 我地走左上船,假船, 飲野, 傾下計. 期間有飛機飛過, 佢地好鬼勁, 話lee架應該係用runway 33, lee架應該係飛廣州. 真係飛機變態.

同埋傾完之後了解多左飛airline 的運作, 對將來真係有幫助. 另一方面,又好開心, 見到班學生由唔識飛, 到上大機.

以上就係我地的一班好學生. 一個食得好飽的晚上. 多謝佢地的一餐謝師宴. 



傾到大概12點到就跟另一位instructor返香港.

搭王崗車返香港.

之後話感動位就黎喇.

話說我個msn 有moible,如果我唔online的話,d offline message會divert去我個加拿大手電.我返香港都帶埋個加拿大電話, in case學校或者其他公司會call到我.

我突然收到個textmessage from msn, 來自一位我一生的第一位好朋友.我地o係05年絕左交. 咁之後就冇聯絡. 其實當年係自己唔好,教飛的人當年只係想飛的人, 唔係太勤力, 加上其他原因令佢感到非常失望. 所以佢就話大家不如唔好做朋友喇.

佢係我一個好重要的朋友, 係我加拿大第一個朋友, 雖然佢係女仔, 但係大家一d隔膜都冇. 好close, 可能因為大家背景差唔多. 所以大家返學,lunch都一齊. frdship 係非常之咁pure.  當時佢離開之後, 我朋友同我講, 話你由而家開始做好D,繼續努力, 佢會見到, 將來或者大家有機會見返面呢? 佢話神的安排係好奧妙.我當時以為佢地只係安慰我先咁講.

自此之後,我真係改變好大. 直頭係第2個人. 去學飛到畢業,一直我都希望,我這位老朋友會見到這一日.

咁話說, 3,4個月前, 我突然見到佢online,好特別,因為佢已經delete 晒我的所有野, 但又見返佢online,初時以為眼花, 但係又唔係bor,又有update 佢ge nn. 但係冇計啦,據我所知, 佢畢左業, 返左香港. 所以都冇乜為意,但其實lee4年內, 都希望可以做返朋友.

終於上個星期,我就諗,不如試下留個message,睇下大家有機會做返朋友,o係香港見下面啦. 但冇幾日內都冇reply,我心諗都應該冇希望ga喇. 算啦.

但就係估唔到佢o個晚會message我, 話當時大家都唔夠成熟, 大家仍然係老朋友, 得閒約出黎見面啦.

我當時真係好感動, 係超感動, 我真係以為自己發緊夢, 竟然可以無端端有返個好朋友.我真係要好感謝神, 感謝神的安排同埋愛護. 亦都證明左努力係唔會白費. 你肯努力,其他人係見到.

這位好朋友, 永遠都係我的好朋友. 朋友船係永遠. 佢當年係好支持我去做pilot, 如今我做到, 我希望我更進一步, 入埋airline,再一次令她感到驕傲. o係10月尾之前,突然間有返個老朋友出現,士氣大增, 好似打左支強心針咁. 今次更加冇藉口唔成功.

一切已經準備好, 經過成個星期的intense特訓, 對今次的把握大左. 亦都作左好多心理上的調整, 盡量幫自己去減壓.

而尋日, 我地傾左一個電話, 4年黎第一次聽到這老朋友的聲音, 佢依然冇變. 大家傾落仍然都老朋友咁傾個不停. 我地仲約左聽日出黎食個tea.

anywayz, 突然發生件令人感動的事, 令我覺得這個世界真係咩都有可能發生, 因為我地唔係神, 好多野係上天幫我地的安排, 好似這件事, 我根本估唔到10月9日有返一個老朋友, 如果唔係上天的安排, 一切只會係神話.

                                                                                                                                                    

P.S, 有好多朋友都問過, 想準備,或者想知道好多飛行知識, 應該睇咩書.

我今個星期o係central library發現到一層,有好多關於飛的書.

o係9樓, other branch of engineerings, o個度有好多飛行的書.

有淺入深都有.

其中有一本我highly recommend俾初學者

叫做private pilot manual

係一件好大本的書,  裡面有好多info, 同埋有好多彩色的圖片,好detail, ,可以幫到大家去理解一d theory等等

不過記住,本書唔可以帶走, 係參考書藉.

但唔係緊要, 一日睇唔完, 第2日再黎過.

各位準飛人, 繼續努力. sky is the limit. 為自己創造一個飛一般的人生.                      


Monday, October 5, 2009

捐血, 捐骨髓

yahoo blog真係好唔穩定. anywayz..

10月2日走左去捐血. 人生第一次捐. 其實早於前個星期已經走左去捐血站諗住捐, 誰不知去到之後, nurse話我由於o係北美洲返黎香港, 而北美洲有個叫做west nile virus, 個潛伏期有28日, 所以未夠期, 唔捐得, 白行.

10月2日, 終於夠28日,有多tim.

先講下個捐血站, 去到原來要填form, 問好多野, 原來飛行屬高危活動,haha. anywayz, 填完之後.就等啦. 等的期間,見到前面的一位女仕填埋捐骨髓的form. 令我覺得不如捐埋骨髓,反正都係幫手, 唔差在啦. 跟住就問左nurse拎左份小冊子, 了解過捐骨髓係咩一回事之後, 就填左份form, 抽多d血. 順便俾個樣本做骨髓登記. 講開骨髓, 陣間詳談.

講返個捐血過程, 入到房同個nurse傾下計, check下temperature之後就去吉針. 我唔知驗乜,總之吉左一下.

之後就可以行去訓床仔. 仲同個男謢好好傾tim,因為佢載住個mask,聽唔清楚佢講野, 原來佢之前o個晚去左睇煙火, 跟住我又問佢好唔好睇, 熱唔熱,係咪真係有個60字樣. 把聲就係因為叫到聲沙. 訓低之後,量完血壓, 佢俾左個類似厠紙桶的物體叫我拎住.

隔左無耐, 佢就返黎, 俾左張骨髓捐贈証俾我. 又送左把扇俾我,仲有富豪酒店,兩張6折buffet 禮劵,佢話獎品源源不絕, 我見到人地有個血包key chain,但佢冇俾我, 不過算啦, 我又唔係為貪o個d 野而捐, 無所謂.

捐血真係簡單到呢......吉一支針, 過程只有4個字" 唔經唔覺"就完左. 抽的期間, 就要拎住個厠紙桶,做一個揸實拳頭,放開, repeat又repeat, 但係做做下, 我發覺隻手好攰. anywayz, 慢慢黎,應該冇問題.

15分鐘, 一包新鮮的血就抽晒出黎, 總共450 ml,唔算多. 一支利賓納仲有找. 同埋捐完又唔覺特別攰, 只不過唔知係咪心理作用, 隻右手有點攰,冇力咁. 跟住抖一陣, 就出左去出面, 好似茶餐廳咁, 問我想飲咩. 飲水, 食下餅,抖多15分鐘就走得.

講真, 我真係highly recommend大家去捐, 男的3個月可以捐一次, 女的就4個月可以捐一次. 同埋,血冇代用品, 如果大家身體健康, 不妨去捐. 旺角銀城廣場11樓有得捐.

捐完之後, 既然o係旺角, 梗係周圍食野啦. 不過最緊要飲返多d水份.


之後講開骨髓, 我簽完張form,了解過之後, 返到屋企做左d research又去左wiki, 又去埋yahoo 知識. 因為好坦白講, 我除左知道骨髓係幫助有血癌的人之外, 對這方便知識非常不足.

一search之下,搵到段新聞, 原來香港只有5,6萬證記左, 其實真係好似少左d.

http://the-sun.on.cc/cnt/news/20090910/00407_031.html

http://hk.news.yahoo.com/article/081128/3/9heq.html

同埋, 當然想知道究竟捐骨髓的過程或者風險係點.

http://hk.knowledge.yahoo.com/question/question?qid=7007071100325

http://www.bmtpa.org.hk/zh/faq/donationInfo.html

http://hk.knowledge.yahoo.com/question/question?qid=7007121001635&q=7007071100325&p=%E6%8D%90%E9%AA%A8%E9%AB%93

其實簡單黎講, 係有一支針,據講幾粗下, 插入骨盆的腸骨內,抽取出黏稠紅色的骨髓液. 可以半身麻醉or 全身麻醉.

睇完之後, 就上左一d forum,睇下有冇人接受過, 或者有類似的經驗. 結果真係有, 有d講得好恐怖. 又話就算麻醉左都會feel到支針, 又話會痛到標眼水, lee世都會記得的痛楚. 又話之後個排打乞痴,走路,坐,什至無神神都可以痛到死 
直頭無心情吃野,有時會痛到嘔(真正痛到嘔)

但係我上網搵到生果報, 有段新聞

http://hk.apple.nextmedia.com/template/apple/art_main.php?iss_id=20081207&sec_id=4104&subsec_id=12731&art_id=11939632

又唔係咁講.又冇講到咁嚴重. anyhow,我覺得可能係唔同方法或者係因個人體質而定. 不過睇完, 就真係睇完, 冇咩野好驚. 

每個手術都有風險. 同埋而家醫學昌明, 應該冇問題吧.生死有命. 開始人生觀都有點改變.   

在家, 爸爸非常支持, 但係媽媽就非常咁反對. 阿婆甚至連捐血都鬧tim, 中秋上到去, 見到我有個傷口. 知道我捐血之後就話" 你好多血咩??仲捐俾人??"

其實我好明阿媽同阿婆的擔心. 但係我想同大家講. 其實證記左, 可能成世人都未遇到一個有需要的人. 但亦可能一遇就遇到, 如果真係遇到, 係一個你同個病人的好強緣份.

如果真係遇到, 真係要幫. 因為你可能係佢的唯一希望.

有人話, 你捐左, 都未必可以救得返, 但我就唔認同, 如果我唔捐, 佢地連希望都冇. 所以如果遇到, 真係要幫佢地.

就算痛一個月先好返, 都係一個月, 總好過佢屋企人成世都唔可以再見到個病人. 將心比己.

我填之前, 有擔心過, 如果我離開香港做野咁點呢??原來佢地可以透過我屋企人, 或者email去通知我.

              

this is the bone marrow donor Card. i always keep it inside my wallet from now on 

   

  

c u next time.