相信大家都從Miss Chan Chan ge blog 得知道這個消息. 如果未知的朋友,那麼我就o係度正式話俾大家聽, 港龍已經取錄左我. 我將會在下月尾起程前往Adelaide, Australia 接受至少6星期的training.
一個十年的夢, 夢想成真,講感受, 真係講幾日都講唔完. 10年夢想, 受過好多人的冷言冷語, 覺得機師o係香港冇可能, 覺得我冇可能做到. 聽完之後仍然要o係佢地面前扮無野, 去到new brunswick 經歷過4年的寒冬, o係-30度下室外捲電線, 推飛機, 幫飛機入油, lee d經驗與痛苦, 我這一世永遠會記住, 但就係因為痛苦係可以鍛鍊人生, 令我對這個夢想更加堅定, 更加堅信自己係可以做得到, 由最初連飛機安全帶都唔識戴, 到可以一個上去飛, 可以考到第一個牌, 再成為一個flight instructor,最後今日可以被一間airline取錄. 真係感觸良多, 當我收到這個消息時,都仲可以強忍淚水,向爸爸媽媽公佈這個消息, 但當見到阿婆, 同佢講返起我這7年, especially o係new brunswick 4年的辛酸, 我終於忍唔住流左好多眼淚, 這4年可以說是我人生中最辛苦的4年, 一個人住, 去到一個people of nowhere 的地方, 冬季氣溫, 加埋風速效應, 經常跌到只得-30-40度, 但做part time時候,每天,天未光, 就要將d飛機由hanger推出apron, 再幫每隻飛機de-ice, 加上日以繼晚的溫書, 飛行累積經驗. 到最後做instructor, 又係經常的飛, 用盡氣力去教好每一個學生, 我其實真係感到心力交瘁, 一個人生活, 好多野真係盡在不言中, 就算幾唔開心都好, 又點? 打返香港,可以ma?屋企全部訓晒, 病, 可以搵邊個? 出街諗住買碗的機會都冇. 好多辛酸都要自己梗晒, 第2朝訓醒, 當冇事發生, 又再工作, 仲有好多,好多痛苦回憶一一o係我同阿婆傾計中浮現, 我流淚, 係因為我多謝自己的身體,一齊同我努力, 我絕對不是一個最好的主人, 經常只係食公仔麵過活, 工作時間長, 經常早起, 晚睡, 冬天又冇帶佢加厚衣服, 我知道我個身體都為我撐得好辛苦. 今日的成功, 終於肯定當日的努力係沒有白費.
當然,我慶幸地人生人遇到一個咁無私的家庭, 將所有時間, 金錢都會花在仔女身上的父母, 亦遇到好多好朋友, 老師, 同老細. o係每一個地方, 香港, toronto, new brunswick都遇到好多朋友對我好好, 好錫我, 令我更有動力都做好每一件事. 今次之所以成功, 並非單憑自己的努力可以達到, 沒有佢地的幫助, 單憑我一人之力, 只會有點力不從心的感覺. 但要多謝的人太多了, 我留待下篇先再講一講.
仲有, 最重要, 多謝blog友們, 某部分blog友更係最早已經認識, 亦有好多blog友對我說由第一篇開始睇晒. 如果你地睇返我以前的故事, 我並非一帆風順, 亦曾有失意, 失敗的時候, 好多謝你地的留言, 去鼓勵支持我, 去撐我去爬返起身再黎過. Thank you.
希望藉著這個機會去鼓勵尚在努力中,或對前路抱有懷疑的朋友, 千萬唔好放棄,一定要堅持,忍耐, 肯捱, 樂觀, 對將來抱有希望. 只要keep住這個夢想, 機會一定會來.
送大家兩句說話
"When the going gets tough, the tough get going" --- 意指前路愈難, 要愈更努力.
"things always happen for a reason" --- 每一件發生都有它的原因. 我就因為試過失敗, 更加從失敗中累積經驗, 令我可以更早裝備好自己, 為下一次的機會更早作準備.
最後, 我要感謝Miss Chan Chan,雖然我與她素未謀面, 但當我準備時interview, 曾提出好多問題, Miss Chan Chan與她的男朋友不厭其煩地幫我手,解答我的問題. 而今次得左, 更特意出一篇blog去寫這個故事. 我自己睇完都好感動. 多謝你地.
最後最後,我應承大家, 今後我會繼續努力, 我清楚知道今次只係一個起點, 學飛的路永遠都唔會完, 就算真係踏上這個崗位, 我相信我仲有大把野要學, 直到退休, 所以我唔會輕敵,繼續堅持對自己的事業有要求. 不會令大家失望.
下次再傾.
No comments:
Post a Comment