今次點樣為自己的仔女,或者為自己o係加拿大落腳讀書
加拿大咁大, 去邊度讀書先好呢? 有親戚住o係附近,係咪就代表好呢? 住toronto, vancouver多唐人係咪就冇咁Lonely呢? 讀私校,定公校好呢?
我個人認為, 去邊度落腳好睇自己的仔女/自己係一個咩人.
就當為自己仔女揀學校為例.
先要諗下自己個仔係咩性格. 咩成績, 咩屋企背景等等.
性格:
而家好多90後的小朋友都好幸福, 父母可以提供好多好好的生活俾自己的仔女, 屋企有工人照顧, 放假有好多活動, 基本要風得風, 要雨得雨. 我明白父母愛錫仔女,就係係咁, 有時可能大家都唔想, 但係愛就係會令自己做左好多為對方開心而做的事情, 例如唔想個仔咁悶, 會買部PSP俾佢玩, 唔想佢著對鞋唔靚,俾人笑, 而買對新的,種種都睇得現在的父母係非常愛鍚仔女,我非常理解.首先利益申報, 我自己都係,我預計到,我係o個d,除左買玩具俾佢玩之外, 會買多份俾自己, 陪個仔一齊玩o個d黎. 但係愛係有一個限度, 去到某個階段, 係要放手, 等佢地自己行佢地條路.
所以, 如果你係我所說的家長的話, 你放個仔女去外國讀書, 無非都希望佢有一個新的開始, 可以有個機會接受不同的教育, 可以學識獨立處事, 咁我會提議大家第一次送佢去d host family住, 同外國人住, 就係我想當年咁喇. 我以過來人身份講, 真係得益不少, 雖有痛苦, 但係值得.
先講host family,大家都明白, 即係俾一筆$$個屋企, 就佢地照顧自己個仔, 但係並唔係個個家庭都係咁, 以我當年為例, 我住的家庭係一個正宗加拿大家庭, 有間屋,屋外有泳池, 又有個front yard打籃球o個隻. 但係佢地只係負責煮, 同埋俾地方你住, 病會帶你睇醫生, 洗衫, bathroom hygiene 全部靠自己. 咁樣會俾自己個仔有機會獨立, 佢唔洗衫咩? 咪著臭衫返學lor, 唔洗bathroom,就由佢污濁lor,睇佢忍得幾耐? 唔執床? 咪唔俾床單佢換lor!我相信頭一,兩月,佢或者可以忍, 兼且o係電話度會呻, 甚至喊, 但係我想講, 喊, 由佢喊, 喊完一樣要做, 千萬唔好喊完收線之後, 你就打去同個屋主,叫佢幫你個仔執手尾, 如果係咁 ,你個仔,永遠唔會長大. 同埋, o係外國家庭住, 會令佢地可以感受下外國生活, 佢就會知道,原來呢, o係外國食飯, 係唔可以戴帽, 哦, 原來食意粉, 可以spoon and fork共用, 哦, 原來呢如果要刀叉, 係應該講can i have the knife and fork 而唔係fork and knife,慢慢佢ge視野會闊, 會更易於接受新事物. 同埋始終外國家庭, 溝通係需要英文, 所以一年後,佢的英文應該會有大的進步, 一年後,佢返香港過暑假,你會發覺得佢會自立好多, 可以自己叫自己起床, 食完野,會自己洗返. 同埋食飯會食到一粒米都冇. 我以前就係咁, 去加拿大之前, 都唔知道食飯咁正, 去到加拿大, 每兩星期先有一次"飯", 真係食到一粒米都冇, 跌左落台都執返黎食. 你話好慘咩? 我又覺得咁樣令我好珍惜食飯的機會.
係咪有親戚在加拿大就係好呢?
我有好多朋友,都係單一匹馬去外國, 投靠親戚, 但係end up反而生活得不快樂. 點解?先講親戚, 究竟係咩親戚, 可能係一些5,6年都唔見一次, 或者梳到冇得更梳遠的親戚. 去到住, 當然佢有責任要照顧你仔/女,但係一方面. 你要諗下人地的仔女又接唔接受到突然間屋企多左個人呢? especially有時d小朋友呷醋, 屋企多左個人, d野分薄左. 咁變左你親戚會好難做. 另外,你要諗下你自己的仔女感受, 大時大節, 佢地一家人做節, 收利是, 有人拜年, 慶祝生日等等, 你自己本身唔係佢地一分子,會變得有時覺得感覺難受. 好似變左自己係外人一樣, 到最後會寧願返房訓覺. 我自己就有咁ge經歷, 我第2,3年跟我媽媽朋友住, 更唔係親戚tim,係我出世佢抱過我之後, 我從來未見過. 但係我同佢冇乜野, 我仲好感謝佢訓練到我而家咁硬淨,佢真係一個好好的前輩. 但係佢另一半o個邊就唔同, 有時我媽媽個朋友好好帶埋我出去食飯, 但係無可避免要聽到一d唔鍾意的說話. 咁你可以點呢? 即時反枱? 唯有死忍. 或者因為而家忍耐力強左, 好老實講, 你同屋企呻, 佢地又可以做到d乜? 都係o個句啦, suck it up!! 大時大節, 帶埋出去食飯, 可能食飯ge人,你根本唔識, 因為係另一邊屋企的親屬, 咁ge情況會令自己覺得好似搭枱咁. 與其係咁, 不如唔好靠親戚.
所以投靠親戚唔係唔好, 先睇下你同該親戚關係如何? 真心話, 有d人好現實, 平時一年都唔打一個電話問候人, 一打黎就問可以幫手照顧個仔, 有d人真係會介意ga. 同埋仲要提醒, 如果你個仔, 未夠18歲, o係加拿大要搵監謢人, 有好多人未必想負這個責任, 講真佢都係想保護自己, 佢心諗"咁耐冇見你個仔/女, 點知佢而家變成點呀?", "萬一黎到加拿大, 成日出去玩,犯左事, 有咩野, 就要搵我做擔保!" 咪喇!" 實有d咁ge人,所以與其係咁, 不如住host family,佢收得你$$,佢就會負擔, 無謂為左仔女, 傷害親戚之間的關係.
寄宿學校可以嗎?
唔住host, 唔寄親戚, 住boarding school又可唔可以呢? 絕對可以. 亦係一個唔錯選擇, 但係費用會幾貴, 因為叫得做boarding school即係私校, 費用比public school貴好多. 所以要考慮金錢上,可唔可以應付到,記住, 唔係一年, 係幾年的生活.
自己個仔/女是否乖同有定力呢?
要選擇邊個省讀書, 要睇你自己個仔/女係咪定性, 如果o係香港都已經成日出街, 唔夜唔返屋企, 又擔心佢o係香港會學壞, 而想送佢去外國讀書. 咁我覺得就唔好送佢去vancouver,toronto等地方, 因為太多中國人, 有中國人就有唱K, 波樓, mall, 唐人, 加上lee d地方交通比較方便, 有subway, 有巴士, 隨時可能跟住識班有$$仔, 一齊走去唱K打機. 一樣讀唔成書.
如果係咁的話,我提議送佢去new foundland, new brunswick, manitoba 等地方, 貪佢咩好? 夠凍, 夠靜, 夠悶.
就以我而家new brunswick為例, 巴士,的士係唯一交通工具, subway更加係冇啦, 最抵死係d巴士下午6點就收工, 星期日仲唔開. 到時想玩都冇得玩啦. 同埋呢, lee度d pub2點就要關門, 想玩天光?no way! 出到門口,凍冰冰, 有咩好做? 不如返屋企訓喇. 星期日仲慘, mall 5點鐘關門, supermarket又係, 5點後,成日死城咁, 仲可以去邊呢?
仲有, lee d 阜仔, 相對上學費比較平, 供起上黎,冇咁吃力.
我敢講, 如果佢地可以o係度生存到,佢會變得冇欲冇求. 加上, 返學唔讀書,有咩好做? internet又慢, dl劇唔係唔得, download完都夠鐘訓覺喇. 生活撲素, 令個小朋友都唔會咁好動, 身心健康一點.
私校一定比公校好?
係咪一定私校就好呢? 無可否認, 私校係好D,但係公校亦唔係想像中咁差. 加拿大的公校係跟地區,即係你唔可以誇區上學. 除非你報假地址啦.
所以其實邊區的公校分別差不多, 當然有些公校比較出名, 想知道邊間公校好, 好多時school board會公佈每間學校每年的成績排名, 可以讓你作參考, 咁如果係visa student,點算? 既然我地帶得$$黎讀書, o係選擇學校方面,自由度比較大, 只要你想讀的學校有位, 佢地會盡量配合. 好似我咁, 我想當年唔係讀richmond hill high school,係另外一間比較差的學校, 我上機到落機都以為係要去差o個間讀, 點不知去到報到先知原來school board幫我轉左校. 真係好多謝school幫我轉左間咁好的high school,讓我識到好多好好的朋友.
仲有, 讀私校會比公校貴, 大概一半至一倍, 又係要考慮財政可唔可以負擔,要知道加紙變動幾大, 我第一年黎先係1對5, 08年竟然升到貴過美金. 你要考慮下財政上,可唔可以配合到.
學生哥又好, 做父母又好, 記住計清條數先落訂.
我想當年學費係每年9000, 差不多一萬加紙. 未計食,住.行.
所以讀私校並非一個最好的選擇.
下一次會講下交通,下次再見.
No comments:
Post a Comment